მთავარი | სიახლეები | სკოლები | სამასწავლებლო | უნივერსიტეტები | სკოლამდელები - skolamdelebi.ge | მსოფლიო | სხვა სიახლეები |
ბოლო ზარის ტრადიცია საქართველოში დიდი ხანია არსებობს. სასწავლო წლის დასრულების შემდეგ ღონისძიება სკოლებში იმართება და მისი მთავარი გმირები გამოსაშვები კლასის მოსწავლეები არიან. მასწავლებლები კი ბავშვებს სკოლის დამთავრებასა და ახალი ცხოვრების დაწყებას ულოცავენ.
ესაა დღე, როდესაც 12 წლის განმავლობაში დაგროვილი მოგონებები ერთად იყრის თავს, არის წარწერებით აჭრელებული თეთრი პერანგები, კეთილი სურვილები და ცოტა ცრემლიც.
ჰოდა, შეუძლებელია, ასეთი მნიშვნელოვანი დღისთვის სკოლა განსაკუთრებულად არ მოემზადოს. არაა მარტივი ემოციების გარეშე დაემშვიდობო ბავშვებს, რომლებიც 6 წლისები, მოცუცქნულები და სრულიად დაუცველები შემოვიდნენ სკოლაში და ახლა, უკვე ზრდასრული მოქალაქეები ტოვებენ მშობლიური სკოლის კედლებს.
სწორედ ამიტომ, ბოლნისის მუნიციპალიტეტის, დაბა კაზრეთის N2 საჯარო სკოლაც განსაკუთრებულად მოემზადა მეთორმეტეკლასელების გასაცილებლად და სასკოლო საზოგადოებამ ყველაფერი გააკეთა იმისთვის, ბოლო ზარის ღონისძიება დაუვიწყარი იყოს ბავშვებისთვის, რომლებიც მალე ცხოვრების ახალ ეტაპზე გადავლენ და უმაღლეს სასწავლებლებში სიამაყით შეაბიჯებენ.