ცნობილმა უკრაინელმა ექიმმა ევგენი კომაროვსკიმ განმარტა, რა შემთხვევაშია საჭირო ბავშვისთვის სიცხის დამწევი საშუალების მიცემა, მაშინაც კი, როცა სხეულის ტემპერატურა მაღალი არ არის. ამის შესახებ პედიატრმა Instagram-ის საკუთარ გვერდზე დაწერა.

კომაროვსკიმ აღნიშნა, რომ ამ კითხვაზე უნივერსალური პასუხი არ არსებობს და ყველაფერი ისეთ ფაქტორებზე დამოკიდებული, როგორიცაა ბავშვის ქცევა, შენობის ტემპერატურა და ტენიანობა, ასევე დიარეისა და პირღებინების არსებობა და ა.შ.

„თუ ბავშვს სიცხე 39 გრადუსი აქვს, მაგრამ იღიმის, მღერის, ხოლო შენობაში არ ცხელა და ტენიანობა ნორმალურია, მაშინ მედიკამენტები საჭირო არ არის. მაგრამ თუ 37,5 გრადუს სიცხეზე, ბავშვი მოთენთილია, არ სვამს, ოთახში კი მშრალი ჰაერია და ცხელა - მაშინ სიცხის დამწევი საშუალებები სასწრაფოდ საჭიროა“, - დაწერა ექიმმა.

კომაროვსკის თქმით, ყურადღება უნდა მივაქციოთ, როგორ იტანს ბავშვი მაღალ ტემპერატურას, მის არაადეკვატურ ქცევას, სუნთქვას, გავითვალისწინოთ თანმხლები დაავადებები. 

„რა თქმა უნდა, უნდა მივცეთ სიცხის დამწევი საშუალებები, თუ ექიმმა გასინჯა ბავშვი და თქვა, რომ საჭიროა ტემპერატურის დაგდება“,- დაწერა პედიატრმა.